அஞ்சு ஜார்ஜும் அபி பாப்பாவும்!!!

நான் வீட்டுக்குள் நுழையும் போது பாப்பாவும் டைகரும் ஓடி புடுச்சி விளையாடிக்கிட்டு இருந்தாங்க. என்னய பாத்ததும் "அப்பா எங்க மிஸ் உங்கள அவுங்களுக்கு போன் பண்ண சொன்னாங்க"ன்னு சொன்னா. பாப்பா நல்லா படிக்கிறதால ஏதாவது பண முடிப்பு தரப்போறாங்களோன்னு நெனச்சுகிட்டு போன் பண்ணினேன்.

"மிஸ் நா அபிஅப்பா. போன் செய்ய சொன்னீங்களாமே?" ன்னு கேட்டேன். அதுக்கு அவங்க "ஆமா, நாளைக்கு 'ஸ்போர்ட்ஸ் டே' அபி 3 ஈவண்டுக்கு சேத்துருக்கோம். பன் சாப்பிடுற போட்டி, சாக்கு ரேஸ், அப்புறம் லெமன்-ஸ்பூன் ரேஸ்" அப்டீன்னாங்க.

"சரி மிஸ் என்னன்ன எடுத்துகிட்டு வரணும்"ன்னு கேட்டேன். அதுக்கு அவங்க"சாக்கு ரேஸ்க்கு சாக்கு, லெமன்-ஸ்பூன் ரேஸ்க்கு லெமனும் ஸ்பூனும்"ன்னு சொன்னாங்க. நான்" பன்னு சாப்பிட என்ன கொண்டு வரனும்"ன்னு கேக்க "ம். வாயிதான்"ன்னு சொல்லி போன வச்சுட்டாங்க. ரொம்பதான் மிஸ்சுக்கு வாய்ன்னு நெனச்சுகிட்டு தங்கமணி கிட்ட விஷயத்த சொல்லிட்டு கிடுகிடுன்னு உபகரணங்களை ரெடிபண்ண ஆரம்பிச்சுட்டோம்.

பாப்பாவ பெரிய ஸ்போர்ட்ஸ் ஸ்டாரா அஞ்சு ஜார்ஜ் மாதிரி மாத்தணும்னு முடிவு செஞ்சாச்சு. அதுக்கு அந்த கெட்டப்ல மாத்தணும்னா டிராக் சூட், ஸ்போர்ட்ஸ் ஷு வாங்கணும்ன்னு 3அடி உயர சூட்டுக்கும், 4.5 இன்ச் ஷுவுக்கும் அலஞ்சி திரிஞ்சி வாங்கிட்டோம். தலை முடியெல்லாம் அஞ்சு மாதிரி குதிர வால் போட்டு கலக்கியாச்சு.

நான் போய் சாக்கும் ரெடி பண்ணிட்டேன். தன் பங்குக்கு பாப்பா கொல்லையில் இருந்து எலுமிச்சம் பழம் பொறுக்கிகிட்டு கிச்சன் போய் ஸ்பூனும் எடுத்துகிட்டு தன் ஸ்கூல் பேக்கில் வச்சுகிட்டா.

மறுநாள் காலையிலேயே கோயிலுக்கு போயிட்டு தேங்காய உடச்சிட்டு பாப்பாவ தூக்கிகிட்டு தங்கமணி, டைகர் சகிதமா களத்தில் குதிக்க கெலம்பியாச்சு.

முதல்ல பன்னு துன்ற போட்டி. பாப்பாவும் ஜாம்பவான் ஜாம்பவிகள் மத்தியில சும்மா கலக்கலா குந்திகிட்டு இருக்கு. அதோட கெட்டப்ப பாத்தா 10 பன்னு சாப்பிட்டுட்டு ப்த்தாதுன்னு கேக்கும் போலயிருக்கு. கண்டிப்பா பாப்பா இந்த ஈவன்ட்ல கலக்கப்போறா!

போட்டி ஆரம்பிச்சுது. தங்கமணி ஒரு பன் எடுத்து பாப்பாவுக்கு ஒரு வாய் டைகருக்கு ஒரு வாய்ன்னு அரை மணி நேரம் ஊட்டி விட்டுட்டு(வீட்டில் அப்டி ஊட்டினாதான் கொஞ்சமாவது சாப்பிடும்) "ஐ நான் ஜெயிச்சாச்சு. பாப்பாவ சாப்பிட வச்சாச்சு"ன்னு சந்தோஷப்பட்டுகிட்டாங்க.

பக்கத்து வீட்டு ராமனாதன் பையன் 5 சாப்பிட்டு 6 வது வேணும்னு அடம் புடிக்கிறான். சரி..இந்த ஈவண்ட் அவுட்டு. அடுத்ததுல பாத்துப்போம்னு சாக்கு ரேஸ்க்கு தயாராயிடோம்.

லைன்ல போய் நின்னு சாக்கை பிரித்தா அது சும்மா 5 அடிக்கு அவங்க மிஸ்ஸ உள்ள போட்டு கட்டலாம் போல இருக்கு. பிரிச்சு பாப்பாவ உள்ள இறக்கிவிட்டா தக்கினியூண்டு உள்ள கிடக்குறா. சாக்கு ரேஸ்ன்னா என்னான்னே தெறியாத பாப்பாவுக்கு இந்த முஸ்தீபுகளிள் பயங்கர சந்தோஷம். பெரிய சாக்கு எடுத்துட்டு வந்ததால நாதான் தங்கமணிகிட்ட..

இப்ப என்ன செய்யறதுன்னு யோசிச்சுகிட்டு இருந்தப்ப அவங்க பிரின்சிபால் மைக்கிலே"குழந்தைகளுக்கு அவங்க அவங்க பேரன்ட்ஸ் ஹெல்ப் செய்யலாம்"ன்னு சொன்னாங்க. அப்பதான் உயிரே வந்துச்சு.

ரெடி ஸ்டாட் சொன்னதும் நான் ஒருபக்க சாக்கின் வாயை பிடிச்சுகிட்டும் தங்கமணி ஒரு பக்கமாவும் பிடிச்சு தூக்கிகிட்டு ஓட ஆரம்பிச்சுட்டோம். பாப்பா ஏதோ பால்கனி கைப்புடிய பிடிச்சுகிட்டு தெருவ வேடிக்க பாக்குற மாதிரி ஜாலியா வருது. கூடவே டைகரும் ஓடி வருது. எனக்கே மூச்சு வாங்குது. இதுல பாப்பா என்னய பாத்து"அப்பா டைகர் பாவம்பா, அதையும் தூக்கி உள்ள போடுப்பா"ங்குது.

பய புள்ளங்க என்னமா ஓடுது. பாப்பா ஒழுங்கா நின்னுகிட்டு வராம பக்கத்துல வர்ர அவ ஃபிரன்ட் கிட்ட "பிரியா! நா புதுசா ஷு வாங்கிருக்கேனே"ன்னு சொல்லிகிட்டு காலை தூக்குறேன்னு பொதக்கடீன்னு சாக்கு உள்ளயே விழுந்துட்டா. சரி ஜெயிச்ச பிறகு தூக்கிப்போம்ன்னு வேர்க்க வேர்க்க இரண்டாவதா வந்து ஜெயிச்சோம்.

பரிச வாங்க போனா "போங்க போங்க அடுத்த கிரவுண்ட பாத்து"ன்னு பிச்சகாரன வெரட்டுற மாதிரி வெரட்டுராங்க பிரின்ஸ். "குழந்தைங்க கீழே விழுந்தா தூக்கி விட்டு ஹெல்ப் பண்ண சொன்னா நீங்களே தூக்கிகிட்டு ஓடுறீங்களே"ன்னு திட்டு வேற.

பாப்பா இத பத்தியெல்லாம் கவலைப்படாம அடுத்த ஈவண்ட்க்கு தயாராயிட்டா. தன் பேக்க எடுத்துகிட்டு ஸ்பூன் லெமன் சகிதமா கிளம்பிட்டா. நாங்க வந்தாதான் சொதப்பிகுதேன்னு அவளை தனியா விட்டாச்சு.

போன 3நிமிஷத்துலேயே "அப்பா நா இஜக்டட்"ன்னு சொல்லிகிட்டு திரும்பிட்டா. வர வர இந்த டீச்சர்களின் அட்டகாசங்கள் தாங்கலையேன்னு நேரா மிஸ்கிட்ட போய்"ஏன் அபி ரிஜக்டட்"ன்னு கேட்டேன். அவங்க பாப்பா பேக்க திறந்து எடுத்து காட்டினாங்க. ஒரு பெரீய்ய சாம்பார் குழி கரண்டியும், சுண்டைகாய் சைசுக்கு ஒரு லெமனும் இருந்துச்சு. சரிதான். பரவாயில்ல சின்ன குழந்ததானன்னு அனுமதிச்சு இருக்கலாம். மோசமான ஸ்கூலு.

ஆக ஒரு வழியா பாப்பா ஸ்போர்ட்ஸ் டேயை முடிச்சுகிட்டு வீட்டுக்கு வர்ர வழியில ஒரு கடைல ஒரு சோப்பு டப்பா, ஒரு எவர் சில்வர் தட்டு, ஒரு பென்சில் பாக்ஸ் வாங்கி பாப்பா கைல குடுத்து "பாட்டி கேட்டா நீ ஜெயிச்சு வாங்குனன்னு சொல்லனும்னு" சொல்லி குடுத்து வீட்டுக்கு கூட்டி வந்தா உள்ள நுழைச்ச உடனே அம்மாகிட்ட"பாட்டி நானு கிரவுண்டுல ஜெயிச்சதால அப்பா இதல்லாம் கடைல வாங்கி குடுத்தாங்க"ன்னு போட்டு உடச்சுட்டா.

நான் இன்னும் கொஞ்சம் வெவரமா சொல்லிகுடுத்து கூட்டி வந்திருக்கலாமோ!!!